Mizandisponibilite
Posté le 29 septembre 2022 • 2 min de lecture • 240 motsPresizyon sou fonksyonè ki an disponibilite
Mizandisponibilite an koresponn ak pozisyon fonksyonè ki kite administrasyon an pandan yon tan san l pa sispann fè pati fonksyon piblik la. Men pandan tan sa li sispann benefisye dwa avansman, retrèt ak lòt avantaj.
Mizandisponibilite ki pi long lan dire 1 an e li renouvlab 1 fwa sou demann fonksyonè a.
Mizandisponibilite an ka pwononse dofis ou sou demann fonksyonè a, men OMRH dwe bay avi l. Fonksyonè a dwe mande reyintegrasyon l 2 mwa pou pi piti avan mizandisponibilite a fini. Si l pa mande reyentegre l nan delè sa, se tankou l t demisyone.
Si w te mande mizandisponiblite pou konvnans pèsonèl, sonje w dwe mande reyentegrasyon w 2 mwa pou pi piti, avan mizandisponiblite a ekspire. Reyentegrasyon sa pa otomatik, li fèt an fonksyon de anplwa ki disponib nan moman an, se gendwa menm nan yon lòt enstitisyon fonksyonè a reyentegre.
Administrasyon an ka pwononse mizandisponiblite a dofis tou
- Kòm mezi disiplinè, lè sa li pa ka dire plis ke 3 mwa;
- Nan ka kote Fonksyonè a nan prizon si l pa kondane pou yon enfraksyon grav, lè sa mizandisponiblite a ap ekspire lè fonksyonè a libere;
- Nan ka yon fonksyonè ki te an konje maladi manch long e ki pa reprann sèvis.
Fonksyonè ki an disponiblite a toujou gen obligasyon rezèv ak diskresyon parapò ak fonksyon li te okipe a.